AGAXORDE celebrou este 9 de setembro unha xornada formativa dedicada a analizar as principais novidades introducidas nas regras do fútbol, unha iniciativa desenvolvida en colaboración coa Federación Galega de Fútbol e o Comité Técnico Galego de Árbitros.

A sesión telemática contou coa participación de Julio Amoedo Chas, director técnico do Colexio Técnico de Árbitros e oficial informador de fútbol profesional, e de Roberto Vázquez Alvite, presidente do Comité Galego de Árbitros. Durante o encontro, os especialistas explicaron as modificacións regulamentarias e analizaron a súa aplicación práctica mediante exemplos audiovisuais e un coloquio aberto cos xornalistas asistentes.

A xornada puxo o foco nun dos principais obxectivos dos cambios normativos: incrementar o tempo efectivo de xogo e reducir as perdas deliberadas de tempo, favorecendo un fútbol máis dinámico, fluído e atractivo para o público.

Principais novidades analizadas

Entre os contidos abordados destacaron as novas normas relativas ás substitucións. Tamén se explicou o protocolo aplicable aos xogadores lesionados. Cando o árbitro debe deter o xogo para que un futbolista reciba atención, este deberá abandonar o terreo de xogo durante a lo menos un minuto, salvo en determinadas situacións contempladas pola normativa.

A seguridade dos futbolistas foi outro dos eixes centrais da xornada. Neste sentido, recordouse que os elementos potencialmente perigosos, como pulseiras metálicas, pendentes, aneis ou outros obxectos similares, non están permitidos, mentres que outros accesorios non perigosos si poden autorizarse.

A sesión incluíu así mesmo explicacións sobre:

  • O balón a terra e os criterios para determinar o equipo que debe recibir a posesión.
  • O dobre toque accidental nos lanzamentos de penalti.
  • A conta atrás de cinco segundos en saques de banda e saques de meta cando existe unha demora deliberada.
  • As novas interpretacións sobre as mans e as ocasións manifestas de gol.
  • As situacións revisables polo VAR, incluída a segunda tarxeta amarela claramente errónea e determinados erros de identidade.
  • A aplicación das regras nos saques de esquina.
  • A posición dos xogadores durante as reanudacións.
  • As pausas de hidratación e arrefriamento.
  • As condutas antideportivas e as accións que poidan provocar enfrontamentos entre futbolistas.

 Unha arbitraxe máis pedagóxica e achegada

Durante a presentación destacouse a importancia de que a arbitraxe sexa cada vez máis comprensible para clubs, xogadores, adestradores, medios de comunicación e afeccionados. Os representantes do Comité Técnico Galego de Árbitros subliñaron que as regras son universais, pero requiren unha explicación clara para facilitar a súa aplicación e evitar interpretacións erróneas.

Nesta liña, informouse da posta á disposición do fútbol galego de materiais divulgativos, entre eles o denominado “Tiempo de revisión”, publicado habitualmente os martes, e un manual visual sobre o funcionamento do VAR e a toma de decisións arbitrais.

Explicouse que, durante as primeiras xornadas de competición, os árbitros poderán reunirse con capitáns e adestradores para aclarar as novidades máis relevantes, especialmente aquelas relacionadas coas substitucións, as lesións e os tempos de continuación.

Un espazo para o diálogo

A xornada concluíu cunha quenda de preguntas no que os asistentes puideron expor dúbidas sobre a aplicación das novas regras en situacións concretas de partido. O diálogo permitiu abordar a relación entre a interpretación arbitral, o sentido común e a necesidade de protexer a integridade física dos xogadores sen prexudicar a continuidade do xogo.

Con esta actividade, AGAXORDE reafirma a súa aposta pola formación e a divulgación dentro do ámbito deportivo, promovendo espazos de encontro entre clubs, profesionais da arbitraxe e axentes vinculados ao fútbol galego.